( الروكتان او الزيركتان )
الاثنين يعطون نفس المفعول ونفس الايجابيات والسلبيات بالعلاج
وانا استخدمتهم اثنينهم احيانا ماالقى الروكتان بالصيدليه ف اخذ الزيركتان
تحتاجين علبتين بالشهر العلبه فيها ٣٠ حبه وكل يوم حبتين
سعر الروكتان ١٨٨
سعر الزيركتان ١٤٠
- ايش هو الروكتان ؟
علاج لحب الشباب المتوسطه او القويه وماينوصف الا بوصفة دكتور ولا تاخذينه بدون استشارة طبيب جلديه
وبعد فحوصات للدم و الكبد والكلى والدهون
الوزن جدا مهم لفترة العلاج وعدد الجرعه اللي تاخذينها
- السلبيات :
الجفاف الشديد بالعين والانف وبشرة الجسم ككل ، والشفايف
يأثر ع الكلى لو قللتي من شرب المويه بشكل مستمر
يأثر على انزيمات الكبد ممكن يسبب اكتئاب لبعض الحالات وهالشي نادر
زيادة الحبوب بالشهر الثاني والثالث
- ضروري التحاليل مره كل شهر
- الترطيب المستمر للشفايف وللعين
- ممنوع الحمل والارضاع فترة العلاج
- شرب المويه بأستمرار
- وضع حمايه من الشمس وقت النهار
- ممنوع تنظيف البشره او السنفره وقت العلاج الا بالغسول الخاص او الصابونه
- مايزود الوزن ولا ينقصه
- مايعالج الاثار
- ممنوع اخذ العلاج بدون وجبه رئيسيه
- ( تجربتي ) :
طلعت لي حبوب من خفيفه لمتوسطه بأخر ثمان شهور ، بالخد اليمين والذقن ، بس ك اي بنت هالشي يأزمني ومايخليني اصبر عليها
من ثاني شهر رحت لطبيب جلديه عطاني علاجات وسوالي جلسات تنظيف للبشره ، نفع معاي بنسبة ٣٠٪
بس الدهون ابد ماتغيرت ، انا بشرتي كانت دهنيه كثيييير وللسبب هذا الدكتور قالي خذي كورس الروكتان
وبما انو حالتي خفيفه تعتبر ووزني ٤٠ ، عطاني كورس مدة اربع شهور حبتين يوميا بعد الاكل ،
اول شهر مر كويس اللهم جفاف بالعين والانف ، من بعد نص الشهر الثاني والثالث زادت الحبوب ببشرتي بشكل اقوى من قبل العلاج وهالشي طبيعي لانه الدهون والحبوب اللي داخل بشرتك تبدا تطلع ، اخر الشهر الثالث والربع بدت بشرتي تصفى والحبوب تختفي وماعادت تطلع لي ولا حبه ، بس باقي اثار بخدودي ، غيير بشرتي بنسبة ٩٠٪ وجدا استفدت من تجربتي فيه
وكل الكلام اللي كان ينقال عنه اكبر من حجمه من ناحية السلبياات لو سويتي تحاليل مستمره مافيه اي خوف
اخر موعد مع الدكتور قالي خلاص نبدا جلسة تنظيف للبشره وبعدها جلسات بالليزر عشان الاثار تختفي ،
- ( روتيني وقت العلاج ) :
اول اسبوع قالي مارطب بشرتي ابد عشان الدهون تبدا تطلع وتخف بالتدريج ، ف اكتفيت بالغسول
وبالليل وقت النوم ارطب عيني بقطره طبيه ، و احط جل الديفرين على كامل بشرتي واذا صحيت اغسله بالغسول
بعد اول شهر صرت استخدم مرطب بشكل خفيف اذا كنت محتاجه بقوه ترطيب بمرطب كيو في الطبي الخالي من العطور
وبما انه عندي حساسيه من زمان ف مع الجفاف جسمي صار يتحسس بشكل كبييير ف استخدمت له زبدة الشيا قبل النوم وبعد مااصحى عشان اتجنب الحساسيه والجفاف قد مااقدر .
