مفضلاتي . .

مفضلاتي خلال شهر ونص حبيت انوع فيهم واقولكم عن الافضل بين اللي جربت او اللي انا حبيته ، 

فرش ريل تكنيك / هاذي المجموعه لتحديد الوجه وليمتد اديشن كلهم حبيتهم وماستغنى عنهم

الفرشاه الاولى من اليسار / للهايلايت مره تجننن وماصرت استخدم غيرها للهايلايت توزعها بشكل متساوي وناعم 

الفرشاه الثانيه / للبودر حجمها صغيره مناسبه لتحت العين تجنننن 

الفرشاه الثالثه / هاذي لها اكثر من استخدام طبعاً هي للكونتور تدمجه بشكل روووووووعه وطبيعي سوا بودر او كريمي ولدمج الفونديشن تجنن من احلى الفرش اللي عندي

ماسكرا من كلارنس ، 

كلارنس من احب الماركات عندي اغلب اللي جربت من عندهم سوا مكياج او للبشره يعجبني 

هاذي الماسكرا تعطي طول اكثر من كثافه مره خفيفه ع الرموش وتكثف كل ماحطيت طبقه ثانيه انا اكتفي بطبقه وحده عشان تكون طبيعيه استخدمها للدوام وماطيحت رموشي ابد 👌🏻

لوز بودر من بوبا ، 

احبها مرره مره مره خفيفه ع البشره وماتبان جافه او باهته تبان فيها لمعه ناعمه على البشره احب استخدمها على الانف وتحت العين 

الشي السلبي فيها علبتها مرره سيئه وتتناثر منها بشكل كبير مع انو كميتها كبيره بس العلبه ماتخدمك من الناحيه هاذي . 

شدو كريمي من كيكو ، 

انا استخدمه لاينر وعندي ثلاث درجات منه 

ثبااااااات فظيييييع 

سواده مو مره قوي بس حبيته عشان ثباته استخدم فوقه كحل سواده اقوى وبكذا اضمن مايبهت ولا يروح 

ينمسح بمزيل زيتي بس 👌🏻

بلاشر من اربن ديكاي ، 

لونه دااااافي مناسب البشرات الغامقه والفاتحه والمتوسطه طبعاً الالوان هاذي على السمر تطلع فتنه 

ثباتهم مررره يجنن استخدمه بالدوام وبالحر وارجع البيت ولسه ثابت ولونه واضح 

من مسحه وحده يطلع اللون ف حاسبي وانتي تستخدمينه 👌🏻

رموش مسس ادورا 

كثير تشبه ريد شيري خفيفه وماتحسس طبقه ثقيله على الجفن

الشكلين هاذي روعه روعه وكمان تناسب العيون الصغيره 

Dw / هذا انسب شي للعيون الصغيره او المبطنه لانو حجمها وطولها وكثافتها مناسب مو اوفر 

تينت من كيكو ، 

طبعاً انا دايم اقول مافي افضل من التينت الكوري 

بس هذا طلع افضل منهم 

روعه بشكل مو طبيعي 

قلوسي يلون الشفايف بشكل طبيعي المظهر القلوسي يروح من الشفايف بس يترك اللون ثابت وطبيعي جداً وافضل مافيه انو مايجفف الشفايف مثل بعض الملونات هذا فيه نسبة ترطيب حلوه 👌🏻

فونديشن اثنين في واحد من جوردانا ، 

الماركه جديده ورخيصه ، 

الفونديشن هذا يعتبر كونسيلر وفونديشن مع بعض 

تغطيته من متوسطه الى فل طبعاً كل ماحطيتي اكثر كل ماعطاك تغطيه اكثر اذا تبين تغطين الاثار ماراح تكفيك طبقه وحده

انا اكتفي بطبقه وحده ويصير خفيييييف واحس بشرتي تتنفس مو مكتومه استخدمه للدوام ويبقى ثابت مايخطط 

يعطي شكل الديوي بشكل بسيط اللي بشرتها دهنيه تحتاج تثبته ببودر لانو بالتي زون يدهن بعد ساعتين 👌🏻

عندي درجتين منه 

اللي ع اليسار مايله للاصفر ف استخدمها ع الاماكن اللي ابيها تنور طبعاً هالطريقه استخدمها للمناسبات ماستخدمها بشكل يومي ، 

فونديشن ايلف ، 

هذا لو اتكلم من هنا لبكرا ماوفيه حقه 

طبعاً انا كنت مو حاطه ببالي ابد ابد اجرب بودر او فونديشن من ايلف احسهم كلام فاضي 

بس وصلني هذا الفونديشن بدرجتين غامق وفاتح 

الفاتح لونه مناسبني جداً مايحتاج افتحه ولا اغمقه 

الغامق مره غامق علي يناسب البرونزيات اكثر ف بخليه لو بغمق لون فونديشن فاتح 

يعطي تغطيه وسطه الى فل كفر 

مايخطط مايتكتل يتوزع بسهوله على البشره 

شكله على البشره نظيييف مستحيل حد يعرف انك حاطه فونديشن رخيص 

يناسب البشرات المختلطه والجافه لانه يعطي ترطيب ولمعه للبشره بشكل خفيف 

استخدمه لكل وقت حتى مناسبات صرت استخدمه واثبته ببودر 👌🏻

زيوت الشعر من ناو ، 

زيت الافوكادو و زيت جوز الهند 

اللي شعرها باهت جاف متقصف لا تستخدم غيرهم 

يعطون الشعر صحه وحيويه ولمعه طبعاً مع الاستمرار والاستخدام مرتين بالاسبوع مع التدليك والمساج لفروة الراس 

مررره حبيتهم و ارتحت عليهم احجامهم صغيره بس راح يطولون معاك لانو ماراح تحتاجين كميه كبيره لشعرك وكثري على اطراف شعرك عشان التقصف 👌🏻

تقدرين تستغنين عن واحد منهم عادي وتستمرين على واحد منهم لانو اثنينهم يعطونك نفس النتيجه 

هايلايت بيكا بالتعاون مع جاكلين ، 

من حلاتها كنت بكتب فيها تدوينه كامله 😍

صدق صدق هذي اللي تستاهل المدح اللي عليها وتستاهل سعرها ، 

الباكج جمييل 

لونها مايل ع الذهبي وبين الصدفي 

اول ماتشوفينها راح تحسيها شيمريه شوي او فيها قيلتر بس لما تحطيها ابد مافيها قيلتر كأنو لمعة مويه على بشرتك وتعكس النور بشكل ررررروعه 😩💔

هي ليمتد اديشن ف انصحكم تاخذونها قبل تنقطع 👌🏻

وبكذا خلصنا ، 

وان شاءالله كل شهر انزل مفضلاتي فيه 

ولا تنسوني من تعليقاتكم ❤️